Kom við og merk gandakendu Føroyar, tá professionel listafólk taka teg við á eina tónleikaferð. Soleiðis lokkaði innbjóðingin til konsertina, Sansa Føroyar, sum Kristina Thede Johansen bjóðaði til á Norðuratlantsbrygguni og í Musikkhúsinum í Århus.

Seinstu trý árini hevur Kristina arbeitt við hesari konsertini í huga, tá hon nam sær útbúgving, ið hon kallar eina praktiska phd í saxofonleiki.

Á skránni vóru fimm nýskrivað føroysk verk, ið øll høvdu saxofonina í miðdeplinum.

- Eg spæli fýra ymiskar saxofonir í hesari konsertini, so tað er ordiliga stuttligt.

Eitt av verkunum eigur Ólavur Gaard, sum fekk til uppgávu at skriva eitt verk, sum skuldi hava røtur í føroysku kvæðunum og vísunum.

Valið fall á Fípuna Føgru, í einari útgávu, sum ikki er so kend, og tað var hetta sum fangaði áhugan hjá Ólavi.