TAKS fær gott skoðsmál

Parturin hjá TAKS í altjóða samstarvinum um at útveksla skattaupplýsingar er væl og virðiliga góðkendur.

Hetta stendur at lesa í nýggjari kanning hjá OECD.

147 lond eru við í skattasamstarvinum OECD, sum er altjóða samstarv um búskap og menning.

Skattamyndugleikar í øðrum londum kunnu fáa avrit av kontum, sum fólk í teimum londunum hava í Føroyum. 

Og TAKS kann fáa avrit av kontum, sum skattaborgarar í Føroyum hava í øðrum londum.

TAKS hevur neyðugu heimildirnar

OECD hevur kannað, um lóggáva og umsiting í Føroyum tryggja, at neyðugar upplýsingar eru tøkar, um TAKS hevur nóg góða heimild at heinta tær og kann útveksla tær skjótt og trygt.

Tíggju slík grundleggjandi viðurskifti vóru kannað, og Føroyar luku øll til lítar, skrivar TAKS.

Álitið er skapt í felagsskapi millum TAKS, Skráseting Føroya, Fíggjarmálaráðið og danska fíggjareftirlitið.

Avleiðing av bankakreppuni

Arbeiðið hjá OECD við at útveksla skattaupplýsingar millum londini byrjaði eftir altjóða bankakreppuna í 2008. 

Føroyar komu spakuliga við í 2011.

OECD er altjóða samstarv um búskap og menning.