Tað siga Jovina Christiansen og Turid Muller, sum eru millum teirra, ið kanna kvinnur í Føroyum fyri bróstkrabba.

- Eg haldi, at vit síggja tað longu, tá vit koma eftir teimum í bíðirúminum, leggur Jovina afturat.

Partur av uppgávuni hjá teimum í mammografiini er at taka sær av kvinnunum, sum koma innar, og at greiða teimum væl frá tí sum hendir, og kanna tær væl, sjálvt um tað kann gerast pínufult.

- Uppgávan hjá okkum er at fáa so góðar myndir sum gjørligt, soleiðis at læknin sær alt tað, sum skal síggjast, og hjá summum kann tað gerast pínufult, men vit gera tað jú fyri kvinnuna, og vit royna at gera tað so skjótt og ómakaleyst sum gjørligt.

Árliga fáa 34 kvinnur í Føroyum staðfest bróstkrabba, og 2-3.000 kvinnur verða kannaðar í sama tíðarbili, veit leiðarin á røntkendeildini, Lisa Frederiksberg, at siga.

Síðan 2017 hevur mammografi-kanning staðið føroyskum kvinnum í boði, tá tær hava fylt fimmti. Hóast nógvar taka av tilboðnum, so eru tað verri enn so allar, ið koma, og nógvar av teimum siga ikki frá, at tær ikki koma.

- Vit høvdu ynskt, at tær, ið ikki ynskja at taka av tilboðnum, søgdu okkum frá, tí vit sita ofta her og bíða eftir kvinnum, sum ikki koma. Tað ber til at gera umvegis Mínboks til dømis, har innbjóðingin kemur, sigur Lisa Frederiksberg.