Á stovningarfundi visti eingin, hvat navn hóskaði seg best, men hetta at spæla fótbólt skuldi so roynast, og sum gamalt orðafelli var í Hvalba, varð sagt aftur og aftur: "Kom gamli, royn, lat okum royna sum frægast, kom nú". Avgjørt varð so bara at kalla felagið Royn.

Ítróttaliga hevur Royn havt fleiri góð tíðarskeið. Millum annað vann felagið meðaldeildina í 1946 ímóti liðum sum HB, KÍ, B36 og TB. Í 70'unum og 80'unum vóru eisini fleiri góð ár.

Vøllurin í Hvalba hevur havt fleiri staðsetingar, áðrenn hann endaði á Skørinum. Longu í juni 1941 var vøllurin eftir tátíðar metum ein tann besti í landinum, tí hinir vøllirnir vóru flest allir av gróti og eyðri, meðan hesin var av sandi. Summarið 1991 varð so endalig støða tikin til, at vøllurin skuldi vera ein grasvøllur, soleiðis sum hann nú altíð hevði verið.

Felagið fekk ítróttahøll, ið varð vígd 27. oktobur 1973, tá ið 50 ára haldið varð hildið. Tá var ætlanin, at høllin skuldi nýtast til innandurafótbólt, hondbólt, badminton, fimleik, borðtennis og flogbólt.

Kelda: bolt.fo