Gera einki við fráboðanina hjá russiskum myndugleikum

Føroyska uttanríkistænastan ger einki við fráboðanina hjá russisku fiskivinnumyndugleikunum um at steðga innflutningi av makreli, sild og lodnu úr Føroyum.

- Russiska stigið er ikki heilt óvæntað, men enn er eingin formlig fráboðan komin til føroysku myndugleikarnar, sigur Gunnar Holm-Jacobsen, leiðari á uttanríkistænastuni í Uttanríkisráðnum.

Hoyr samrøðu við Gunnar Holm Jacobsen:

Russiskir trolarar, Runavík

Russisk skip í Runavík, áðrenn havnarstongsilin var settur í verk. (Savnsmynd)

Áheitanin kemur frá Rosrybolovstvo, sum er ein stovnur undir russiska fiskimálaráðnum. Í tíðindaskrivi í gjár sigur stovnurin, at hann mælir russisku stjórnini til at seta í verk innflutningsbann á fisk úr Føroyum.

Í tíðindaskrivinum verður eisini nevnt, at tilmælið um innflutningsbann er eitt aftursvar til tey tiltøk, ið eru sett í verk móti russiskum fiskivinnufyritøkum. Víðari stendur, at tiltøkini vilja ikki ávirka matvørutrygdina hjá Russlandi, tí russisk skip sjálvi fiska hesi fiskasløg.

Sí eisini: Væntar at russar seta tiltøk í verk móti Føroyum

Sí eisini: Uppsjóvarvirki halda ondini