- Tíðindi, mentan og ítróttur
Skjóta seinasta skotið í dag
![](https://kvf.fo/sites/default/files/styles/grein-ovasta-mynd/public/dalstunnil1.jpg?itok=0L3gPQX-)
Klokkan 15 í dag verður hátíðarhald í Dali í sambandi við, at seinasta skotið í nýggja tunlinum til bygdina verður latið av.
Tað verður Anfinn Johannesen, sum fer at trýsta á knøttin at skjóta seinasta skotið í tunlinum.
Anfinn Johannesen er dalbingur og starvaðist sum maskinførari hjá Landsverki í góð 40 ár frá 1973 til 2013. Ein av uppgávunum hjá honum hesi árini var at halda bratta vegin til Dals opnan fyri kava.
Vegurin stongdur
Hátíðarhaldið í dag ger eisini, at vegurin millum Húsavík og Dal, eisini nevndur Dalsvegurin, verður stongdur í umleið ein tíma frá klokkan 14.30 til 15.30.
Landsverk sigur, at bilar kunnu parkera við bygdarhúsið í Húsavík, haðani bussur koyrir klokkan 14.15 til hátíðarhaldið.
Tá ið seinasta skotið er latið av, bjóðar Landsverk til kaffi og køkur í gamla skúlanum í Dali, har øll eru vælkomin.
Dalstunnilin er 2.200 metrar langur og 8 metrar breiður.