Rætt at fara í samhugaverkfall

Føroya Lærarafelag hevur verið á fundi við Fíggjarmálaráðið, har felagið fekk at vita, at ráðið fer at koma við einum sektaruppskoti, tí felagið óheimilað fór í samhugaverkfall seinasta fríggjadag saman við hinum feløgunum á almenna arbeiðsmarknaðinum.

Jacob Eli S. Olsen sigur, at tey væl vistu, at felagið hevði eina fráboðanarskyldu, sum tey ikki hildu, men tá Løgtingið setti inn við lóg, so var ikki annað at gera.

- Tað var pura rætt av Lærarafelagnum og øðrum fakfeløgum at fara í samhugaverkfall við sjúkrarøktarfrøðingunum, nú landsstýrið valdi at fara í Løgtingið at lóggeva tær aftur til arbeiðis og harvið gera seg inn á verkfallsrættin. Men innanfyri tað, sum er skrivað í avtaluni hjá okkum, so var tað ikki heilt í tráð við tað, sigur formaðurin í Lærarafelagnum.

Hann vísir á, at verkfallsrætturin er tann møguleikin, sum fakfeløgini hava at gera vart við seg við teirra sjónarmiðum vegna sínar limir.

- Tá man velur at lóggeva ímóti tí, so siga vit frá, tí tað er nakað, man ger við samráðing og ikki við lóggávu, sigur Jacob Eli S. Olsen.

.