Tvær milliónir brúktar til at manna Sjúkrahúsverkið við útlendingum

Sjúkrahúsverkið hevur higartil í ár brúkt meira enn tvær milliónir krónur til at manna sjúkrahúsini við sjúkrarøktarfrøðingum úr útlendskum vikarstovum. 

Tað er munandi meira enn undanfarin ár.

Tað vísir innlit, sum Kringvarpið hevur fingið. 

Síðstu fimm árini hevur Sjúkrahúsverkið tilsamans brúkt 5,9 milliónir krónur til at keypa fyribils arbeiðsmegi til Føroya.

Í 2019 brúkti Sjúkrahúsverkið 1,4 milliónir krónur til vikarar, men næstu árini minkaðu útreiðslurnar nógv.

Í 2020 var upphæddin smáar 600.000 og í 2021 um 500.000 krónur. 

Í 2022 vuksu útreiðslurnar 175 prosent, tá 1,4 milliónir krónur vóru brúktar til vikarar. 

Og stóri vøksturin heldur fram, tí higartil í ár hevur heilsuverkið brúkt 2,1 millión krónur til at manna føroyska sjúkrahúsverkið við útlendskum vikarum.