Tilvitskan um matframleiðslu skal økjast

Vinnumálaráðið hevur játtað trimum verkætlanum tilsamans 750.000 krónur fyri at økja um tilvitskuna um føroyska matframleiðslu.

Talan er um stuttfluttar, føroyskar, dygdargóðar og heilsugóðar matvørur.

Klaksvíkar kommuna fær 300.000 krónur, sum partvíst verður við til at fíggja eina royndarverkætlan við skúlamati.

Serbreytin á Kambsdali fær 50.000 krónur til eina verkætlan, ið hevur til endamáls at menna tilvit og virðing fyri eginframleiðslu, og fyri førleikunum at gerast meira sjálvbjargin við mati.

Húsarhaldsskúli Føroya og Matkovin fáa 400.000 krónur til verkætlanina "Matfrø(ð)i", sum er ein verkstovurøð, har undirvíst verður í burðardygd, kostfrøði, matmentan, handfaring av rávørum og matgerð fyri ávikavist børnum og vaksnum. 

Tríggjar umsóknir komu inn, skrivar Vinnumálaráðið.