Onnur hvør skurðviðgerð var útsett

Onnur hvør skurðviðgerð í Sjúkrahúsverkinum var útsett í verkfallinum.

325 skurðviðgerðir eru útsettar.

Av tí at verkfallið bleiv so drúgt, eru sjúklingar, sum í fyrsta umfari vóru útsettir, kortini lagdir undir skurð, tí støða teirra versnaði, meðan verkfallið var.

Tað sigur Margit Stórá, landsstýriskvinna, í svari til Erling Eidesgaard, løgtingsmann.

Erling Eidesgaard

Erling Eidesgaard, løgtingsmaður. (Mynd: Bjarni Árting Rubeksen)

3.000 viðtalur útsettar

Landsstýriskvinnan sigur eisini, at sambært Sjúkrahúsverkinum eru 3.000 viðtalur útsettar,  fluttar ella avlýstar í verkfallsraktu ambulatoriunum.

Tað eru 44 prosent færri enn í sama tíðarskeiði í fjør. Taka vit bara november, er minkingin yvir 60 prosent.

Tá løgtingið legði upp í verkfallið og segði, at leiðslan í Sjúkrahúsverkinum hevði heimild at áseta neyðugu undantøkini, var eisini ásett ein kærunevnd at viðgera avgerðirnar hjá Sjúkrahúsverkinum um undantøk.

Sjúkrahúsverkið veit ikki um, at nøkur avgerð er kærd, sigur Margit Stórá, landsstýriskvinna.