Teistin kanska á Kalsoyarleiðina

Í síðstu viku var Teistin í Nólsoy fyri at vita, hvussu skipið royndist har. Í dag varð siglt á Kalsoyarleiðini. Fleiri fólk á Strandferðsluni vóru við; eisini var umboð fyri Landsverk, sum umsitir ferjulegurnar, við. 

Tað var ikki nakrar trupulleiki hjá Teistanum at koma til Syðradals ella til Klaksvíkar, men nakrar tillagingar mugu gerast á ferjulegunum, um Teistin skal sigla har í framtíðini.

Í uppskotinum til fíggjarlóg fyri 2024 er ætlanin selja Teistan. Landsstýrið væntar at fáa 30 milliónir krónur fyri skipið.

Magnus Olsen, skipari á Teistanum, heldur tó ikki, tað er rætt at selja skipið, sum er frá 2001 og millum tey nýggjastu í flotanum hjá Strandferðsluni.
 

Hellir meir til Teistan á Kalsoyarleiðini

Niels Juel Arge, stjóri í Strandferðsluni heldur, at tað sum loysir seg best í longdini, er at gera nakrar tillagingar á ferjulegurnar á Syðradali og í Klaksvík, so at Teistin kann sigla har í framtíðini.

Hvussu nógv tað fer at kosta er ikki greitt enn.

Hann sigur, at tað er neyðugt at hava størri rampu á Syðradali í framtíðini. Hann heldur, at tað eins væl kann gerast nú.

Harumframt eru avbjóðingar við 43 ára gomlu Ternuni, um hon skal sigla á Kalsoyarleiðini.