Reyði Krossur Føroya: Hálv millión til neyðstødd í Myanmar

Við stuðli frá landsstýrinum hevur Reyði Krossur Føroya latið 500.000 krónur til at styrkja arbeiðið at betra um sálarheilsuna hjá neyðstøddum í Myanmar.

Serliga fer peningurin til at styrkja førleikarnar hjá Reyða Krossi í Myanmar at veita sálarliga fyrstuhjálp til børn og ung, umframt at seta á stovn barnavinarlig rúm í neyðstøðum.
 
Í grundgevingini fyri at lata stuðulin, skrivar Reyði Krossur, at samanbrestir eru millum vápnaðar bólkar, og vatnflóð og trupul atkomuviðurskifti gera tí longu sváru humaniteru støðuna í Myanmar enn verri. 

Rikin frá húsi og heimi

Fleiri enn tvær mió. fólk eru rikin frá húsi og heimi. Umleið 40 prosent av teimum eru børn, sum nú noyðast at búgva í ovurfyltum legum, í frumskóginum ella øðrum fyribils skjólum. 

Heimleysar familjur liva undir sera ótryggum viðurskiftum og stríðast fyri at fáa mest grundleggjandi tørv á reinum vatni, mati, heilsu- og reinførisviðurskiftum nøktaðan.

Hendan støðuga strongdin og óttin hava ógvusligar avleiðingar við sær, bæði fyri kropp og sinn, og serliga er sálarheilsan hjá børnum og ungum í vanda, skrivar Reyði Krossur Føroya.