25 munnligir fyrispurningar í tinginum

Munnligir fyrispurningar eru í tinginum í dag, og landsstýrisfólk skulu svara tilsamans 25 spurningum.

Spurt verður millum annað um Tjóðleikhúsið, hvat skal henda við Teistanum, tá koyrandi verður í Sandoyartunlinum, Dalstunnilin, Tjørnuvíkartunnilin, ferðsluviðurskifti við Gøtugjógv og fastar kommunulæknar á ellis- og røktarheimum. 

Sí yvirlit yvir spurningarnar her. 

Løgtingið fer eisini atkvøða, um Dennis Holm, landsstýrismaður, skal svara skrivligum fyrispurningi frá Elsebeth Mercedis Gunnleygsdóttur, løgtingskvinnu, um undirsjóvarbreyt, metro, til útoyggjarnar.

Hon sigur, at farvegurin til Nólsoyar kundi verið ein byrjan.

Føroya rættur, Dómhúsið

Síðani 2018 er rættargangslógin í Føroyum bara broytt eina ferð. (Savnsmynd)

Broytingar í rættargangslógini

Løgtingið fer í dag eisini viðgera nógvu broytingarnar, sum Løgmálaráðið mælir til at gera í rættargangslógini.

1.januar 2021 kom í gildi nýggj og dagførd rættargangslóg fyri Føroyar. 

Landsstýrið og danska stjórnin vóru tá samd um, at rættargangslógin skal dagførast regluliga, so munurin á rættargangslóggávuni í Føroyum og Danmark ikki aftur verður so stórur.

Nú verður skotið upp, at broytingarnar í donsku rættargangslógini, sum eru komnar síðani 2018, og eru viðkomandi fyri okkum í Føroyum, vera settar í gildi her.

Síðani 2018 er rættargangslógin í Føroyum bara broytt eina ferð.

Eisini er neyðugt at broyta lógina, tí reglur um sammóðirskap eru komnar í Føroyum.

Løgtingið hevur samtykt eina nýggja lóg um foreldramyndugleika og samveru.

Og seinastu broytingarnar, sum eru gjørdar um hvítvask, krevja eisini broytingar í rættargangslógini.