Ófráboðaðir fyrispurningar í tinginum í dag

Ófráboðaðir fyrispurningar eru á skránni hjá løgtinginum í dag.

Fyrsta viðgerð verður um uppskotið hjá landsstýrinum um fult afturgjald í staðin fyri hálvt fyri meirvirðisgjald fyri grønar hitaskipanir verður eisini næsta ár.

Og talgildir tíðindamiðlar skulu nú sleppa undan meirvirðisgjaldi.

Tíðindabløð sleppa longu sum er undan meirvirðisgjaldi.

Minkar í stigum

Stigvísa minkingin í afturberingini av meirvirðisgjaldi fyri grønar hitaskipanir verður broytt, tí hildið verður, at tað er ov ógvisligt at minka stigvísu afturberingina eftir verandi leisti.

Nú verður skotið upp, at næsta ár verður eisini alt meirvirðisgjaldið afturgoldið.

Í 2025 vera 75 prosent av meirvirðisgjaldinum afturgoldin, í 2026 50 prosent, í 2027 25 prosent og síðani einki.

Í 2018 vóru 86 umsóknir um afturbering. 

607 umsóknir

Í 2022 vóru 346 umsóknir, og higartil í ár eru komnar 607 umsóknir um at fáa meirvirðisgjaldið fyri grønar hitaskipanir afturgoldið.

TAKS, sigur, at til 1.november í ár eru afturrindaðar 23,6 mió. kr. 

Í sama tíðarskeiði í fjør var talið 8,8 mió. kr., og tað var 2,4 mió. alt árið 2021.

Meirvirðisgjaldsfrítøkan hjá talgildum tíðindamiðlum verður mett at kosta landskassanum hálva millión.

Tingfundurin er klokkan 10.00.