The Longest Johns á Gøtusand

Triðja mikudag á rað kunnger G! eitt útlendskt navn, ið verður at hoyra á festivalinum í summar.

Hesa ferð er tað The Longest Johns úr Bristol, Onglandi. 

"Tað er torført at ímynda sær nakað hugnaligari enn at standa við sandi millum tærnar á Gøtusandi og anda rákan av sjóroki og syngja enskar sjómansvísur," skrivar G! festivalurin í tíðindaskrivi.

Sjómansvísur

The Longest Johns byrjaði at spæla fyri góðum tíggju árum síðani.

Frá fyrsta degi vóru teir drivnir av alskinum til sjómansvísur.

Tá ið innspæling teirra av gamla lagnum "The Wellerman" tók dik á seg, fóru øll brádliga at práta um "Sea Shanties".

Hetta setti gongd í alla ta alduna, sum fleiri onnur síðani eisini hava riðið væl á. 

Hjartaligt og sjórænarasligt

The Longest Johns hevur latið úr hondum fleiri útgávur við gomlum sjómansvísum og egnum tilfari.

Teir syngja og spæla lystiliga á millum annað pumpuorgul, gittar og mandolin, og onkuntíð tríva teir í reinan a capella sang.

"Tað er hjartaligt, inniligt, erligt og ikki sørt sjórænarasligt," boðar G! festivalurin frá.