Yrkisdepilin: Yrkisútbúgvingar framvegis høgt í metum

Gongdin yvir nýggjar lærusáttmálar í 2023 vísir, at yrkisútbúgvingarnar framvegis eru høgt í metum millum ung og tilkomin fólk, sum skulu velja sær yrkisleið.

Í 2023 valdu 376 fólk at gera lærusáttmála við ein arbeiðsgevara fyri at fáa eitt sveinabræv ella eitt yrkisbræv, og tað er yvir 57 prosent av einum miðal føroyskum árgangi.

Tað skrivar Yrkisdepilin í tíðindaskrivi.

Konjunkturarnir í Føroyum hava stórt árin á, hvussu nógvir lærlingar byrja í læru á hvørjum ári, og hetta sæst eisini týðiliga í sveiggjunum í tølunum frá ári til árs. 

Lærlingar, Yrkisdepilin

Bara 27 prosent

Í 2009, beint eftir fíggjarkreppuna, fóru bara 27 prosent av einum miðal føroyskum árgangi undir yrkisútbúgving, og tað er nógv tann minsta tilgongdin í einum ári, um hugt verður at seinastu 20 árunum. 

Tey 376 fólkini, sum fóru í læru í fjør, taka 44 ymiskar útbúgvingar. 

Verða allir virknir lærlingar taldir við, eru í dag sløk 1.000 fólk í ferð við at taka 58 ymiskar yrkisútbúgvingar í Føroyum, skrivar Yrkisdepilin.