Veðrið ávirkar næstseinasta umfar

Av tí at veðurforsøgnin fram til sunnudagin boðar frá vánaligum fótbóltslíkindum, verður næstseinasta umfar møguliga framskundað til leygardagin

Vánaligt veður um vikuskiftið kann hava við sær, at næstseinasta umfar í fótbóltskappingini verður framskundað

26.09.2012 - 12:42

Nú landskappingin í fótbólti hjá monnum av álvara nærkast endanum, er eisini liðið so mikið væl út á heystið, at veðrið er farið at gera um seg. Fótbóltssamband Føroya hevur boðað feløgunum kring landið frá, at vegna vánaliga veðurforsøgn til komandi sunnudag, er møguleiki fyri, at allir dystirnir, sum eftir ætlan skulu spælast sunnudagin klokkan 14.45, verða framskundaðir til leygardagin 29. september klokkan 14.45. Sagt verður frá nógvum vindi og regni um vikuskiftið, og serliga sunnudagin kann rættiliga vánaligt veður væntast. Endalig avgerðin um, nær 26. og næstseinasta umfar í Effo-deildini verður avgreitt, fellur hósdagin klokkan 16, tá FSF gevur nærri boð um hetta, upplýsir Fótbóltssamband Føroya á heimasíðuni.