Lokaupphæddin hjá lærarum í rættin

Fríggjadagin verður fyrireikandi fundur í Føroya rætti um lokaupphæddina hjá limunum í Lærarafelagnum.

68 limir í Lærarafelagnum hava stevnt felagnum.

Tey vilja, at avgerðin á aðalfundinum 29.apríl í fjør um at strika lokaupphæddina í samlagstryggingini hjá limunum, verður gjørd ógild.

Á aðalfundinum atkvøddu 280 fyri at strika lokaupphæddina. 61 atkvøddu ímóti.

100.000 kr.

7.juni í 2000 var avgjørt á aðalfundi at broyta eina samlagstrygging, so limirnir fingu 100.000 kr,, tá tey blivu 67.

Hetta gjørdi, at limirnir vóru bundnir at rinda til skipanina.

Á aðalfundinum í fjør kom ein limur við uppskoti um, at lokaupphæddin var strikað fyri allar limir alt fyri eitt.

Tað var samtykt við stórum meiriluta.

Hálvur tími er settur av til rættarfundin fríggjadagin.