Fiskivinnulóg fær avleiðingar fyri Royal Greenland

Uppskotið um nýggja fiskivinnulóg fyri Grønland fær avleiðingar fyri stóra felagið Royal Greenland.

Felagið vísir á, at lógin fær avleiðingar fyri dótturfelagið Pelagic Greenland, tí har eigur ein íslendingur 27 prosent.

Sambært lógaruppskotinum er útlendsk ogn ikki loyvd í grønlendsku fiskivinnuni.

Váðafúsur kapitalur

Royal Greenland, sum annars er nøgt við uppskotið, sigur, at felagið fegnast um útlendska ogn, tí haðani koma váðafúsur kapitalur og knowhow.

Royal Greenland vísir á, at felagið kann ikki noyða ein partaeigara at lata frá sær sín part í felagnum.

Felagið, sum sjálvstýrið eigur, mælir tí til, at landsstýrið fær í lag sølu av útlendska partinum.