Semingsstovnurin komin upp í samráðingarnar

Sáttmálasamráðingarnar millum Kommunala arbeiðsgevarafelagið  og Føroya Skipara- og navigatørfelag um nýggjan sáttmála fyri havnarmeistarar og havnarumsjónarfólk eru slitnaðar, og semingsstovnurin er boðsendur.

Tað upplýsir Skipara- og navigatørfelagið.

Partarnir vóru samdir um at senda boð eftir semingsstovninum, sum hevði fund við partarnar í dag, har Skipara- og navigtørfelagið og Kommunala arbeiðsgevarafelagið greiddu frá viðurskiftum í samráðingunum.

Avtalað er, at semingsstovnurin setir seg í samband við partarnar í næstu viku.

KAF og Skipara- og mavigatørfelagið hava havt 10 samráðingarfundir, síðani krøvini vórðu løgd fram fyrst í september.

16. januar boðaði KAF frá, at tey góvust við samráðingunum, og partarnir vóru samdir um at senda boð eftir semingsstovninum.