Lesiátakið snýr seg um at lesa gular bøkur. Tað vil siga bøkur, sum hava okkurt gult á permuni. Er tað kortini so, at onkur fegin vil lesa eina bók, ið ikki er gul, so ber til at seta ein gulan prikk á, siga Thordis Dahl Hansen og Sara Leonhard Dybvad, sum hava bókasavnið um hendur.

Mannagongdin er soleiðis, at tá ein bók er lisin, skal eitt bókaummæli gerast og latast inn á bókasavninum. Fyri hvørjar 10 síður fær man eitt miniegg umframt ein lutaseðil. Seinni verður lutakast um eitt stórt páskaregg og sjálvandi eisini bøkur.

At lesa hevur stóran týdning, heldur Thordis Dahl, tí við bókini kanst tú hvíla teg frá tær sjálvum. Tí hava vit øll brúk fyri viðhvørt, leggur hon aftrat.

Umframt at vera skúlabókasavn, er bókasavnið í Skúlanum við Streymin eisini opið fyri almenninginum mikudagar frá klokkan 14 til 20.