Ein stór uppliving

Tað er ikki á hvørjum degi, at fólk, sum búgva á bústovni hjá Norðoya Bú og Heimatænastu, fáa innbjóðing til tiltøk uttanfyri heimið. Síðsta ár var NBH eisini partur av Spæl føroyskt vikuni, men tá varð skipað fyri ymiskum tónleika framførslum á teimum ymisku heimunum.

Talan var um eina heilt serstaka løtu, tá ið bæði búfólk, tey sum fáa heimatænastu, tey sum ganga í dagtilhald, venja í Ven og Virka og tey sum koma í Virkishúsið Smæran, vórðu boðin til eina tónleikaframførslu í Varpinum.

Tað var ikki bara sum at siga tað, at fáa flutt øll búfólkini, tí m.a. skuldu 30 koyristólar flytast millum heimini og Varpið. Við góðum vilja og røskum starvfólkum eydnaðist tað at samla nógv fólk í Varpið.

Fleiri framførslur vóru hendan dagin. Millum annað sang barnakórið á Skúlatrøð nakrar sangir.