Kappast um at gera miðbý í Fuglafirði

Tað eru nógvar avbjóðingar at loysa, áðrenn Fuglafjørður kann breggja sær av at hava ein veruligan miðbý. Millum annað er nógv tung ferðsla og ein vegur beint gjøgnum bygdina býtir bygdina í tvey.

Nú skulu tríggjar arkitektafyritøkur kappast um at loysa hesa uppgávuna og síðan samskipa miðbýin, so hann verður eina meira samanhangandi eind.

Hetta stendur milum annað í innganginum til kakkpingarskránna, sum er tað arkitektafyritøkurnar skulu arbeiða út frá:

"Miðbýarætlanin skal taka støði í miðbýarøkinum sum heild við atliti at eindunum: Býarkjarnin, Mentan og frítíð, Fríløtuøki og Vinna. Við at hugsa heildina í smærri eindir, verður lættari at arbeiða við miðbýnum. Eindirnar hava ymiskt virksemi, og til dømis eru bústaðarøkini, fótbóltsvøllur, kirkja og kirkjugarður dømi um fastar eindir, ið miðbýarætlanin skal tillaga seg eftir. Hinvegin eru fríari teymar og meira pláss at arbeiða við fríløtuøkjum og býarkjarnanum, og hvussu eitt nú vinnuøkið kann koma at virka betri saman við hinum eindunum. Fjøltáttað virksemi má fegin vera, men við einum samanspæli millum eindirnar. Miðbýarætlanin skal varðveita ymiskleikan í økjunum, og samstundis betra um samanhangin millum økini ella býarpartarnar."