- Tíðindi, mentan og ítróttur
Stórsigrar til trý tey ovastu
![](https://kvf.fo/sites/default/files/styles/grein-ovasta-mynd/public/kyndil_kvinnur_ok.jpg?itok=qkIp_AVz)
Trý tey ovastu liðini í SMS-deildini vunnu øll stórsigrar sunnudagin.
Turið Arge Samuelsen skeyt ikki færri enn 13 mál, tá Kyndil vann heili 44-27 á VÍF í Havn. Liðini fylgdust fyrstu minuttirnar, men síðan fóru tær grønu undan teimum gulu, sum máttu leggja rygg til stórtap.
Neistin vitjaði StÍF á Skála, har tað gekk javnt á í fyrra hálvleiki. Bert eitt mál var á muni í steðginum, men miðskeiðis í seinna hálvleiki skrædnaði, og Neistin vann 35-26. Bjørk Franksdóttir Joensen skeyt níggju mál fyri tær bláu.
Í Hoyvík smurdi H71 Stjørnuna av. Við 10 málum gekk Anna Elisabeth H. Weyhe á odda fyri hoyvíkingarnar, sum vunnu heili 37-18, og nú hava tær næstan tryggjað sær í minsta lagi 3. pláss.
Kyndil er fremst við 35 stigum, Neistin hevur 28 stig á 2. plássi, og H71 er á 3. plássi við 25 stigum.
EB kundi taka týðandi stig í stríðnum um síðsta plássið í endaspælinum, tá tær vitjaðu VB í Vági. Tað gjørdu tær hvítu eisini við Talitu Alves á odda. Hon skoraði níggju ferðir í 25 -20 sigrinum, og nú er EB trý stig frammanfyri Stjørnuna, sum tykist uppsteðgað.