Pauli fekk stóran skaða í eygað

Pauli Jacobsen, landsliðsmálmaður í hondbólti, fekk álvarsaman skaða í høgra eygað undir venjing herfyri, sum hevði við sær, at ikki hann hevur kunnað vant hondbólt í fýra vikur. 

At byrja við helt Pauli bara, at talan var um enn ein bólt í høvdið, men tað vísti seg, at høgra eygað hevði fingið stóran skaða.

Seinni sama kvøld, sum Pauli varð raktur av bólti, tók ein vinmaður mynd av honum og sendi hana til ein lækna.

Læknin bað Paula fara á sjúkrahúsið alt fyri eitt, har hann varð kannaður og innlagdur.

Morgunin eftir varð hann kannaður av eygnalækna, sum staðfesti alt fyri eitt, at ein riva var á nethinnuni, og at talan var um nethinnuloysn. 

Pauli Jacobsen skuldi leggjast undir skurð alt fyri eitt. 

pauli_jacobsen_eftir_skurdvidgerd.jpg

Caption: 

Soleiðis sá Pauli Jacobsen út nakrar dagar eftir skurðviðgerðina. (privatmynd)

Fyrsta vikan var tung

Skurðviðgerðin gekk, sum hon skuldi, men fyrstu vikuna kundi Pauli nærum einki gera.

Sjónin á høgra eyga var sera avmarkað, og hann mátti ikki lesa ella hyggja í telefonina.

- Fyrsta vikan var tung at koma ígjøgnum, sigur hann í telefonini úr Danmark, har hann býr og spælir við danska felagnum HØJ í næstbestu deildini. 

EM í hondbólti 2024, EM24, Føroyar, Slovenia, Pauli Jacobsen

Frítekst tagging: 

Ítróttur

Hondbóltur

EM 2024

Føroyar

Caption: 

Í mai mánaði skal føroyska A-landsliðið spæla HM-undankappingardystir móti Norðurmakedónia, men enn er ógreitt, um Pauli verður klárur. 

Heim at venja uppaftur

Nú eru fýra vikar lidnar, síðan skaðin hendi, og í næstu viku sleppur Pauli so spakuliga í gongd við venjingina aftur. 

Danska hondbóltskappingarárið er av, so hann fær skjótt frí frá hondbólti í Danmark, men fyri framman standa landsdystir. 

So fyri at kunna venja uppaftur alt fyri eitt fer Pauli Jacobsen heim at venja saman við barndómsfelagnum H71 í eina tíð.

Í løtuni veit hann ikki, nær hann kann spæla aftur á hægsta stigi, men tað er greitt, at Pauli Jacobsen frameftir fer at spæla í verndarbrillum.