Ísland: Misálit á ráðharra kann gera, at stjórnin rýkur

Uppskot um misálit kemur illa við, nú teir tríggir stjórnarflokkarnir í Íslandi royna at skipa nýggja stjórn, eftir at Katrín Jakobsdóttir, forsætisráðharri, stillaði upp til forsetavalið.  

Flokkur fólks­ins ætlar framvegis at leggja fram uppskot um misálit, tí Svandís Svavarsdóttir, ráðharri, steðgaði íslendsku hvalaveiðuni dagin fyri, hon skuldi byrja í fjør summar.

Altingsins umboðsmaður hevur sagt, at ráðharrin hevði ikki lógarheimild til at taka hetta stigið.

Sjálfstæðisflokkurin ivasamur

Ætlandi kemur uppskotið um misálit á skránna hjá altinginum í morgin ella mikudagin.

Sagt verður, at ikki øll tingfólk Sjálfstæðisfloksins eru til reiðar at verja ráðharran.

Gera tey ikki tað, altso stuðla ráðharranum, rýkur samgongan, siga tey Vinstru-grønu.

Svandís Svavarsdóttir er í Vinstra-grøna flokkinum.