Icelandair flogskipari: Fantastiskt at síggja framburðin í Vága floghavn

Flogskiparin á fyrsta túrinum hjá Dash 8-flogfarinum hjá Icelandair, Kristján Arnar Jakobsson, var hugtikin av góðum umstøðunum í Vága floghavn

Bjarni Árting Rubeksen

Manningin á fyrsta túrinum hjá Icelandair á nýggju Føroyaleiðini. Frá vinstru: Kristján Arnar Jakobsson, flogskipari, Laufey Bjarnadóttir, flogterna, Sigrún Helga Hólm, flogterna, og Jóhann Atli Hafliðason, stýrimaður

Uni L. Hansen

01.05.2024 - 21:30

"Tað er deiligt at vera aftur í Føroyum," staðfesti royndi flogskiparin Kristján Arnar Jakobsson, tá hann trygt hevði lent Dash 8-flogfarið hjá Icelandair í Vágunum.

Harvið vóru Kristján Arnar Jakobsson og manning hansara við til at skriva føroyska loftferðslusøgu, nú Icelandair sjósetti eina nýggja Føroyaleið í dag.

Kristján Arnar Jakobsson var skjótur at framhevja stóru ábøturnar, ið eru gjørdar við Vága floghavn seinastu árini.

"Tað er deiligt at síggja framburðin, sum er hendur her. Flogvøllurin er betri, komuhøllin er framúrskarandi, so eg vænti, at vit fara at hava tað gott saman her í Vágunum," staðfesti fyrikomandi flogskiparin á fyrsta túrinum á nýggju Føroyaleiðini hjá Icelandair.

Kristján Arnar Jakobsson rósti eisini fólkunum, ið arbeiða í loftferðsluni í Føroyum.

"Eg eri hugtikin av, hvussu góð kunningin um veðurviðurskiftini, kastivindar og sovorðið í Vága floghavn er. Tað kundi verið trupult at rokna út fyrr, tá ið mann skuldi seta seg her."