850.000 kr. til verkætlanir at menna landbúnaðin

Umsóknarfreistin til stuðul til menning og vøkstur á landbúnaðarøkinum í ár er longd til 15. mai. 

Á fíggjarlógini eru 850.000 krónur játtaðar til verkætlanir, sum kunnu skapa størri vitan, menning og vøkstur á landbúnaðarøkinum.

Í reglugerðini fyri játtanini stendur m.a., at verkætlanirnar, sum fáa stuðul úr nýggju játtanini til framburð og menning á landbúnaðarøkinum, skulu fremjast í samstarvi við Búnaðarstovuna.

Búnaðarstovan skal tryggja, at úrslitini gerast atkomulig hjá almenninginum og tøk hjá øðrum at brúka. Játtanin kann eitt nú verða nýtt til kanningar, skjalfesting og til praktiskar royndir.

Uttanríkis- og vinnumálaráðið umsitur játtanina.