260 hjún vóru vígd í fjør - 61 fóru hvør til sítt

Í fjør vóru 260 hjún vígd í Føroyum. Í 2022 vóru tey 287.

Kirkjuligar vígslur vóru 162 í fjør og borgaraligar 98, skrivar Hagstovan.

Lutfallið var tað sama í 2022.

Í fjør vóru 61 hjúnaskilnaðir. Teir vóru 64 í 2022.

Flestu vígslur í 1999

Síðani 1990 vóru flestu vígslur í 1999, tær vóru 299. Tær fæstu vóru í 1996, 186.

Flestu skilnaðir vóru í 2010, 92.

Teir fæstu vóru í 1996. Tá blivu 32 hjún skild.

Meira enn helvtin teirra, sum búgva í Føroyum, er ógift. Tey eru 54,3 prosent, skrivar Hagstovan.