Netanyahu: Ísrael kann stríðast einsamalt

USA hevur boðað frá, at USA fer at halda vápnasendingum aftur, um Ísrael ger innrás í Rafah, men tað ávirkar ikki ísraelska forsætisráðharran

Benjamin Netayahu, forsætisráðharri, sigur, at Ísrael fer at stríðast, til bara neglirnar eru eftir.

Mynd: Reuters/Ritzau Scanpix

Marjun Dalsgaard

10.05.2024 - 08:37

- Ísrael klárar seg sjálvt og kann stríðast einsamalt, um tað skal vera.

Tað sigur ísraelski forsætisráðharrin, Benjamin Netanyahu, eftir at USA hevur boðað frá, at tað ikki longur fer at veita vápn til Ísraels, um landið ger innrás í Rafah í Gasa.

- Verða vit noydd til tað, so standa vit einsamøll. Eg havi sagt, at um neyðugt, stríðast vit, til vit bert hava neglirnar eftir at stríðast við, sigur hann.

Amerikanski forsetin, Joe Biden, hevur boðað frá, at USA fer at halda vápnum aftur, um Ísrael ger innrás í Rafah, skrivar BBC News.

Onkur sending av bumbum er longu hildin aftur, tí stúrt verður fyri, at ein slík innrás fer at krevja nógv sivil mannalív.