Nú fer brennievni at ganga undan

Tað ganga bara nakrir heilt fáir dagar, so eru tangarnir á bensinstøðunum tómir.

Tað siga stjórarnir í báðum oljufeløgunum.

- Vit hava diesel eftir á trimum bensinstøðum í Suðuroy, og vit hava bensin eftir á øllum støðum uttan á Argjum, Klaksvík, Leirvík og í Saltangará. Men tað gongur skjótt, so eg vænti, at tað verður tómt í morgin ella í ovurmorgin, sigur Gunnar Nielsen, stjóri í Effo.

Gunnar Nielsen, Effo, 16:9

Gunnar Nielsen er stjóri í Effo. (Mynd: Bjarni Árting Rubeksen)

Hava keypt meira enn væntað

Tað hava verið langar bíðirøðir við bensinstøðirnar kring landið seinastu dagarnar, og tí hevur tað gingið eitt sindur skjótari at tøma tangarnar, enn leiðslurnar í oljufeløgunum roknaðu við, tá verkfallið byrjaði.

- Vit høvdu væntað, at tað fór at røkka til tvær vikur, so tað hevur gingið eitt sindur skjótari at tøma tangarnar, sigur Gunnar Nielsen.

Hjá Magn er støðan á leið tann sama sum hjá kappingarneytanum.

Finn Jakobsen sigur, at hjá teimum er tað bara á Sandi, at tey bæði hava diesel og bensin eftir í tangunum, men hann væntar somu gongd sum kappingarneytin ger.

- Vit vænta, at tað verður tómt, tá vikuskiftið er av, sigur Finn Jakobsen.

Finn Jakobsen

Finn Jakobsen, stjóri í Magn.

Rakar pendlarar

Tað vil siga, at tey, sum hava fylt sær tangan og skulu pendla til arbeiðis, kunnu gera tað, men tað merkir eisini, at tá tangin tømist, stendur bilurin.

Nær tað verður, veldst sjálvandi um, hvussu nógv verður koyrt, men tað er ikki óhugsandi, at tað gongur ein vika, so fara tangarnir, sum enn eru fullir, at tømast, og tað fer so at hava við sær, at alsamt fleiri fólk ikki sleppa til arbeiðis, tí bussarnir koyra heldur ikki.

Bensinstøð, Magn og bensinstøð

Neyðsendarakfør

Hóast hvørki diesel ella bensin er eftir til vanligu brúkararnar, so fara fólk framhaldandi at síggja bilar við bensinstøðirnar. Tær eru partur av tilbúgvingini, og tí skal brennievni til bilar vera til taks til neyðsendarakfør.

- Tað hava vit sjálvandi, og har er eingin "góða mamma." Tí tað verður bara til neyðsendarakfør, siga báðir stjórarnir í oljufeløgunum.

Fólk kunnu annars fylgja við á heimasíðunum hjá oljufeløgunum. Har er yvirlit yvir, hvar brennievni enn fæst.