Avgerð um kongsvitjan ein av næstu døgunum

Tað er nú góð hálvonnur vika til Fríðrikur kongur og Mary drotning eftir ætlan skulu á fyrstu almennu vitjanina í Føroyum sum kongshjún.

Men verkfallið ger, at ivamál eru um vitjanina.

Aksel V. Johannesen, løgmaður, sigur í stuttari viðmerking við Kringvarpið í dag, at tey fylgja gongdini við verkfallinum, men er onki hent við verkfallinum miðskeiðis í komandi viku, verður vitjanin av ongum á hesum sinni.

Fríðrikur kongur og Mary drotning skulu eftir ætlan vera í Føroyum frá 11. til 14. juni.

Tað eru í morgin 3 vikur, síðani verkfallið byrjaði. Hósdagin hittust verkafeløgini og Føroya Arbeiðsgevarafelag við Semingsstovninum, men semingsmaðurin metti tað ikki vera grundarlag fyri at fara undir semingsroynd tá.

Sum Kringvarpið skilir í dag, er onki hent millum partarnar síðani.