Granskaðu fyri 376 milliónir í 2022

Almennir stovnar og fyritøkur í Føroyum brúka munandi meira til gransking og menning á royndarstigi enn fyri 20 árum síðani.

Tað skrivar Granskingarráðið.

Í 2022 varð granskað fyri 376 milliónir kr. Upphæddin svarar til 1,5 prosent av BTÚ, bruttutjóðarúrtøkuni.

Tað er tó minni partur av BTÚ enn í hinum Norðanlondunum. Í Danmark eru útreiðslurnar 2,9 prosent, í Íslandi 2,7 prosent, í Noregi 1,6 prosent og í Svøríki 3,4 prosent av BTÚ.

Gransking

Langt eftir á mál

Hóast støðan er betri enn fyri 20 árum síðani, so er enn langt á mál at røkka teimum 3 prosentunum, sigur Annika Sølvará, stjóri í Granskingarráðnum.

Evroparáðið setti í ár 2000 sum mál, at londini í Evropa skuldu brúka trý prosent av BTÚ til gransking og menning í 2010.

Trý prosent er eisini tað, Ráðið fyri Gransking, Menning og Nýskapan mælir til.

Nýggju hagtølini vísa sostatt, at Føroyar enn eru langt frá málinum, skrivar Granskingarráðið.

Annika Sølvará

Annika Sølvará er stjóri í Granskingarráðnum.

Tvífalt so nógvir granskarar

Talið á granskarum í Føroyum er meira enn tvífaldað seinastu 20 árini. Í 2022 vórðu tilsamans 276 ársverk innan gransking og menning. 

Í 2003 vóru 131 ársverk.

Umleið  eins nógvar kvinnur og menn eru granskarar, 153 menn og 123 kvinnur. 

Tó eru fleiri menn teknikarar og vísindalig hjálparfólk.