Liðug at kanna málið um álop á Argjum

Politiið er liðugt við kanningararbeiðið í sambandi við álopið á Argjum í vár.

Nú skulu løgfrøðingarnir hjá ákæruvaldinum gera av, um tann skuldsetti skal ákærast.

Tað var sunnukvøldið 28. apríl, at ein kvinna var álopin á gøtuni við Sandá, eystan fyri fótbóltsvøllin á Argjum.

Ein maður var tikin eitt korter eftir álopið. Hann var tikin í kirkjugarðinum við Velbastaðvegin.

Maðurin, sum er skuldsettur fyri álopið, noktar seg sekan.

Maðurin hevur verið í varðhaldi síðani, hann var tikin.

Seinast, varðhaldið var longt, var 25. juni. Tað var tá longt í fýra vikur.

Tað góðtók maðurin sjálvboðin, so hann skuldi ikki í rættin.