Vænta at seta stjóra á Landsverki fyri ólavsøku

- Tað gongur framá at seta stjóra á Landsverki, og í løtuni eru vit í síðsta umfari av setanartilgongdini. 

Tað sigur Elin Mortensen, aðalstjóri í Fiskivinnu- og samferðslumálaráðnum, sum varðar av Landsverki. 

Væntandi verður stjórin settur fyri ólavsøku, sigur hon. 

Sjey umsóknir

Tá freistin at søkja starvið fór, vóru sjey umsóknir komnar.

Starvið sum stjóri á Landsverki er flokkað í 39. lønarflokki sambært sáttmála millum Tænastumannafelag Landsins og Fíggjarmálaráðið. Talan er tó ikki um tænastumannastarv. 

Tann, ið settur verður, má kunna tola broytingar í starvinum.

Starvið er áramálssett í fimm ár, men møguleiki er at leingja setanina trý ár. Ein eyka viðbót verður latin fyri áramálssetan.