Ongin reglugerð um hvílutiðir í Føroyum

Ongar reglugerðir eru í Føroyum um hvílutiðir fyri lastbilar og bussførarar. Tað vil siga, at tú kanst koyra so leingi sum tú vilt út í eitt, uttan at tú skalt halda nakra steðg.
- Um tú ert ov troyttur ella ov sjúkur so skalt tú ikki koyra bil, men tú skalt hvíla. Men tað er ein torfør grein at prógva, sigur Karl Leonson, leiðari fyri ferðsluna, Føroya politi. 

Hann sigur eisini at tað hevði verið hent hjá politinum at hava eitt tól, har ein kann síggja at onkur hevur koyrt ov leingi.

Strangari reglugerð um hvílutiðir í øðrum londum.
Í til dømis Danmark er reglugerðin væl strangari. Koyritíð skal í mesta lagi vera 4,5 tímar. Nýtt koyriskeið kann bert byrja, tá tilsamans í minsta lagi 45 minuttir steðgur er hildin. Steðgirnir kunnu býtast soleiðis, at tað er ein stuttur steðgur á 15 minuttir og síðani ein longri steðgur á minst 30 minuttir.

Í mesta lagi 9 tímar kunnu ganga millum tvær dagligar hvílur. Einaferð um vikuna hevur ein lastbilførari rætt til hvíld í minsta lagi 45 tímar, og millum hvørja av hesum hvílum kunnu ikki ganga meira enn 6 dagar. Tað skulu í mesta lagi koyrast 56 tímar í eina viku.

Onga ætlan at gera broytingar
Dennis Holm, landsstýrismaður, umsitur ferðslulógina. Hann hevur ongar ætlanir um at gera nakrar broytingar og ivast eisini í, um hann fær politiska undirtøku. Hann fer tó møguliga at taka tað upp í heyst, tá hann hevur regluligan fund við Ferðslutrygd og Akstovuna.