- Tíðindi, mentan og ítróttur
Studentafeløg: Menstruatiónsvørur eiga at vera tøkar á vesunum á Setrinum
![](https://kvf.fo/sites/default/files/styles/grein-ovasta-mynd/public/menstruation.jpg?itok=wwmnBiEz)
Ráð teirra lesandi og Meginfelag Studenta hava heitt á Setrið um, at hava menstruatiónsvørur tøkar til tey lesandi á vesunum hjá Setrinum.
Hetta hevði verið eitt lítið átak hjá Setrinum, sum kann hava ómetaliga nógv at siga fyri summi lesandi, sigur Harriet Dam, forfólk í Ráð teirra lesandi.
"Um tú av onkrari orsøk ikki hevur eitt bind við tær, so er tað ein torfør støða, ið tú kemur frá," sigur hon.
Mismunur á lesandi
Setrið hevur kannað, um tað hevur heimild til at syrgja fyri, at menstruatiónsvørur eru á vesunum. Men Barna- og útbúgvingarmálaráðið hevur víst á, at lestrarstuðul dekkar hesar vørur.
Studentafeløgini vísa á, at lærdir háskúlar í øðrum Norðurlondum og í Bretlandi hava menstruatiónsvørur á vesunum, og tí skilja tey ikki, at tað ikki skal vera gjørligt í Føroyum eisini.
Harriet Dam, forfólk í Ráð teirra lesandi, heldur, at hetta er at gera mismun á teimum lesandi, tí tað eru bara kvinnur, ið hava tørv á menstruatiónsvørunum.
"Tað er meira enn helvtin av teimum, sum lesa á Setrinum, ið hava tørv á menstruatiónsvørum."