Heilsustýrið: Sig okkum frá positivum koronukanningum

"Vit hava eina hóming av, at nógv fólk brúka heimatestirnar og fáa staðfest, at tey hava koronu. Tí hava vit áhuga í, at fáa svarið sendandi, fyri at fáa eina hilling á, hvussu høgt smittutalið er í Føroyum," sigur Bjarni á Steig, stjóri í Heilsustýrinum. 

Í grannalondum okkara eru smittutølini fyri koronu vaksandi. Heilsustýrið heldur eyga við gongdini í Føroyum, bæði við smittutølum fyri koronu og fyri aðrar umfarssjúkur. Hetta verður gjørt fyri, at sjúkrahúsverkið skal kunna leggja sítt virksemi til rættis.

Í Føroyum eru ikki staðfestir tilburðir av koronu síðstu tvær vikurnar. Tað vísa tøl frá Rannsóknarstovuni á Landssjúkrahúsinum, sum javnan sendir fráboðanir til Heilsustýrið. Smittutølini fyri aðrar umfarssjúkur sum kikhosta og influensu A+B eru eisini heilt í botni.

Bjarni á Steig er stjóri í Heilsuverkinum.

Heilsustýrið heitir á fólk um at senda eina fráboðan um koronasmittu til: hst@hst.fo

Í fráboðanini skulu hesar upplýsingar vera:

Navn
Bústaður
Telefonnr.
Føðingardagur
Dagfesting fyri staðfesta koronusmittu
Viðmerk: Korona