Sverri undan innleiðandi: Ætlar sær pláss á innastu breytunum

Sverri Sandberg Nielsen rør fyri at vinna, tá innleiðandi umførini fyri einskullarar er á skránni leygarmorgunin. 

Honum nýtist ikki neyðturrviliga at leggja so nógv fyri, tá hann møtir rógvarum úr Paraguay, Hong Kong, Bulgaria og Ungarn - tríggir av fimm fara í fjórðingsfinalurnar - men góð úrslit tíðliga kunnu koma miðvinginum til góðar seinni.

Veðrið hevur verið svikaligt leingi, og tí kann tað gerast ein fyrimunur at liggja á mittastu breytunum. 

 - Vit hava fyrireika okkum upp á, at tað nokk skal koma í hvussu er ein róður, har tað verður keðiligt veður, segði Sverri Sandberg Nielsen.

sverri_media.jpeg

Soleiðis var eisini fyrsta dagin, tá bátarnir vórðu pakkaðir út, men síðan hevur veðrið skikkað sær væl - munandi betur enn væntað.

 - Teir seinastu dagarnir hevur tað sæð gott út, og tað sær eisini út til, at tað verður gott veður teir næstu dagarnir, men nú fáa vit at síggja, segði Sverri Sandberg Nielsen.

 - Men eg vænti, at tað kann vera ein fyrimunur at liggja rætt á hesum róðrarbananum, so planurin er at koma væl frá byrjan og royna at fáa tær bestu plaseringarnar sum gjørligt, so at eg verið lagdur inn á tær bestu breytirnar.

Ryggurin argar

Tað er ikki bert veðrið, sum argar sterka føroyska rógvaran, sum kappast í Olympisku leikunum fyri aðru ferð. Á venjingarlegu í Portugal hevur Sverri Sandberg Nielsen fingið ilt í ryggin og hevur róð munandi minni enn ætlað av tí sama.

 - Eg havi ikki ordiliga verið í bátinum teir síðstu átta dagarnir nú. Eg havi róð átta kilometrar upp á átta dagar, so eg havi verið tvær ferðir á vatninum, segði Sverri Sandberg Nielsen.

 - Vónandi eri eg komin yvir tað, og kann rógva frítt í morgin (leygardag, red.), og so fáa vit at síggja, hvussu tað gongur.

Ólavsøkukrydd

Fyri trimum árum síðan róði Sverri Sandberg Nielsen sjálva finaluna ólavsøkudag, og føroyingar í túsundatali á Kongabrúnni í Havn sóu miðvingin missa bronsuna mestsum á mállinjuni. 

Hesa ferð verður ein møgulig finala ikki fyrr enn 3. august, men føroyski rógvarin vónar at rógva fjórðingsfinalu ólavsøkudag, og soleiðis krydda føroyingum tjóðarhátíðina.

 - Munnu fólk ikki kunna savnast og hyggja at eitt sindur av OL-kappróðri, meðan tey halda ólavsøku, segði Sverri Sandberg Nielsen.

Miðvingurin rør í sætta umfari í morgin, og sambært ætlanini verður tað umleið klokkan 9:00 føroyska tíð. Kringvarpið bloggar beinleiðis frá innleiðandi róðrinum hjá Sverra Sandberg Nielsen.