- Tíðindi, mentan og ítróttur
Álop og mótálop millum Ísrael og Hizbollah
![](https://kvf.fo/sites/default/files/styles/grein-ovasta-mynd/public/20240825-115527-7-1920x1280we.jpg?itok=zUrCh7uT)
Álop og mótálop millum Ísrael og Hizbollah hava verið í nátt og í morgun, og stríðið í økinum harðnar.
Sambært bretska kringvarpinum, BBC, sigur ísraelski herurin, at eini hundrað stríðsflogfør lupu á mál hjá Hizbollah í suður Libanon í morgun. og Hizbollah skeyt rakettir inn í norðarar part av Ísrael.
Er talan um 100 flogfør, er hetta størsta ísraelska álop á Libanon síðani kríggið millum Ísrael og Hizbollah veruliga byrjaði í 2006, skrivar BBC.
Álopini hjá Ísrael byrjaðu um hálvgum fimm tíðina lokala tíð, klokkan hálvgum tvey okkara tíð, og BBC sigur frá, at Hizbollah legði ætlanir um eitt stórálop hálvan tíma seinni, klokkan fimm lokala tíð.
Sambært BBC, sum endurtekur ónevndar keldur í Ísrael, vóru millum annað ætlanir um rakettálop á Tel Aviv, størsta býin í Ísrael.
Hizbollað sigur seg hava skotið fleiri enn 300 rakettir móti hernðarligum málum har norðuri í Ísrael, har luftávaringar hava ljóðað.
Ísraelski verjumálaráðharrin hevur boðað frá neyðstøðu í landinum eftir álopini hjá Hixbollah á Ísrael við rakettum og dronum.
Sambært Miðeysturkorrespondentinum hjá Tv2, hevur Ísrael vitað av álopinum hjá Hizbollah frammanundan og leyp tí á tey støðini, sum Hizbollah skuldi skjóta frá.
Kortini hevur tað, sambært Hizbollah eydnast at skjóta 320 rakettir móti Ísrael.
Hetta eru størstu og harðastu álop frá Hizbollah og Ísrael síðani oktobur.