Fingu bara 32 toskar á Føroyabanka

32 fiskar.

Tað var samlaða veiðan av toski, sum føroyska rannsóknarskipið, Magnus Heinason, fekk í 29 hálum á Føroyabankan fimm dagar í septembur. Føroyabanki er fiskigrunnur í ein útsynning úr Føroyum.

Tað, sum ið hvussu er hevur verið serstakt við Føroyabanka, er, at eitt egið slag av toski fæst har. Hetta er toskur, sum orsakað av góðum hitaviðurskiftum og nógvari føði veksur skjótt, og sum sigst vera góður til matna.

Støðan er vánalig

Eru yvirlitstrolingarnar hjá Magnusi Heinasyni eftirfarandi, er støðan hjá toskinum á Bankanum sostatt sera vánalig. Teir 32 toskarnir, sum komu í trolið hesaferð, eru bara ein helvt av veiðuni í fjør, tá ið veiðan eisini var stak vánalig, sigur Havstovan, sum ger árligar kanningarnar við Magnusi Heinasyni á Føroyabanka.

At fáa 32 toskar í 29 hálum er næstan at draga svart; altso at fáa onki. Men tað er at fegnast um, sigur Havstovan, at toskurin henda túrin var 10% feitari enn fyri einum ári síðan.

Eisini lítið til av hýsu

Gleðin á Havstovuni er kortini stokkut, tí tað stendur ikki bara illa til við toskinum á Føroyabankanum, sum annars verður sagdur at vera eitt vakstrarparadís fyri fisk. Lítið er nevniliga eisini til av hýsu, sum heldur til fast á bankanum, og upsa, sum er ferðandi fiskur á leiðini við Føroyabanka.