Runavík: Tað er ein avbjóðing at byggja ein bý í eini líð

Stóra kommunukanningin hjá Kringvarpinum vísir, at í mestsum øllum kommunum í landinum eru fólk meir ella minni misnøgd við bý- og bygdarplanleggingina hjá kommununi.

Kommunukanning2024 - Talva planlegging

Spurningur: "Hvussu nøgd/-ur ert tú við hesi viðurskifti?: Bý- og bygdarplanlegging". Spurdi persónurin svarar á einum stiga frá 1 til 7, hvussu nøgdur viðkomandi er um spurningin, har 1 er "Sera væl nøgd/-ur" og 7 er "Sera illa nøgd/-ur". Hesi svarini eru síðani umroknað til eina stigaskipan frá 0-100, og jú hægri talið er, jú størri er nøgdsemið hjá fólki. 175 fólk í Runavíkar kommunu svaraðu í kanningini.

Býarplanlegging kann fevna um so nógv. Hvar skulu nýggjar útstykkingar gerast? Hvussu skulu vegaføringarnar vera? Hvar skal ídnaðurin halda til, og hvussu við handilslívinum? Og hvar skulu fólk búgva?

Tórbjørn Jacobsen, borgarstjóri í Runavíkar kommunu, heldur, at býarplanleggingin á vestara armi á Skálafjørðinum kann vera rættiliga trupul.

- Tað er ein avbjóðing at byggja ein bý í eini líð, sum gongur framvið einum fjørði, sigur Tórbjørn Jacobsen.