Ísraelar noyðast at fyrireika seg til álop úr Libanon

Fólk í Ísrael mugu vera fyrireikað til, at Hizbollah frameftir fer at leypa á í Ísrael.

Tað ávarar ísraelski herurin um. 

Libanski heimaherurin skeyt í morgun í minsta lagi 50 rakettir inn í býin Kiryat Shmona har norðuri í Ísrael. 

Eingin fólkaskaði var.

Eitt talsfólk fyri ísraelska herin heitir á íbúgvar í landinum um at fyrireika seg til við stuttari fráboðan at fara í bumbuskýli.

Fara ávaringarlúðrarnir at ljóða í Tel Aviv-økinum, hava fólk ein til hálvannan minutt til at finna sær eitt bumbuskýli at fara í, sigur talsfólkið við Ynetnews.

Masoud Pezeshia

Masoud Pezeshian.(Mynd: Reuters)

Kann ikki standa einsamalt

Iranski forsetin, Masoud Pezeshian, sigur við amerikonsku tíðindarásina CNN í dag, at Hizbollah 'ikki kann standa einsamalt' í krígnum móti Ísrael. 

Tað skrivar AFP, sum hevur umsett samrøðuna úr farsi til enskt mál.

- Hizbollah kann ikki standa einsamalt móti einum landi, sum verður vart og fær stuðul frá londum í Vesturheiminum, londum í Evropa og úr USA, segði forsetin, sambært tíðindastovuni. 

Pezeshian sigur eisini, at tað má ikki henda, at Libanon verður tað nýggja Gasa.