Beinir við í "Vild med dans" fríggjakvøldið

TV2 hevur sent boð eftir dugnaliga føroyska sangaranum og sangskrivaranum Beinir Troest Rasmussen at luttaka í "Vild med dans". 

Tað verður tó ikki á dansigólvinum, at ungi føroyingurin skal royna seg, men hinvegin á pallinum saman við nýggja "Vild med dans"-orkestrinum.

"Tað er avgjørt ein fyrimunur fyri meg at standa á pallinum og ikki á dansigólvinum," staðfestir Beinir skemtandi í sambandi við, at hann skal luttaka í "Vild med dans".

Beinir skal syngja nýggjasta staklagið hjá sær "Call Me A Dreamer" í "Vild med dans", sum er sera væl umtóktu undirhaldssending við nógvum hyggjarum - ikki minst í Føroyum.

Beinir, ið er ættaður úr Saltangará, gleðir seg. 

“Tað verður stuttligt at sleppa at syngja 'Call Me A Dreamer' saman við hasum orkestrinum”, sigur Beinir. 

Vind í seglunum

Beinir hevur veruliga fingið vind í seglini á danska tónleikapallinum. Hann spælir nógvar konsertir, tónleikurin hjá honum verður javnan spældur í donskum útvarpi, og so tykist hann vera komin í samband við tey røttu fólkini innan donsku tónleika- og undirhaldsvinnuna í Danmark.

"Jú, tað gongur sera væl. Tað er fantastiskt at uppliva, at fólk taka væl ímóti mínum tónleiki og koma til mínar konsertir. Eisini er tað spennandi at hava fingið fótin innum í donskum útvarpi, og at fáa møguleikar at spæla í donskum sjónvarpi," greiddi Beinir Troest Rasmussen frá fyrr í ár. 

Beinir gongur eisini einari spennandi tíð í møti, tí hansara debutpláta sum vaksin, "Greener", kemur út 25. oktober, og í tí sambandi kemur Beinir eisini til Føroya at spæla konsert í Løkshøll á heimabeiti í Runavík 23. november. 

Konsertin í Løkshøll er partur av einari longri konsertferð, ið Beinir fer á í sambandi við útgávuna av "Greener". Umframt konsertir í Danmark og Føroyum, so gongur leiðin eisini til Týsklands. 

Beinir konsertferð