Stytt arbeiðsvika kostar landi og kommunum 280 milliónir

Gjaldstovan hevur gjørt eina yvirskipaða meting um, hvussu nógv stytt arbeiðsvika fer at kosta landi og kommunum í lønum og gjøldum, sum hanga uppi í lønum.

Úrslitið er 280 mió. kr.

Og land og kommunur fáa 100 mió. kr. meira í skatti.

Men fortreytin er, at ongar effektiviseringar eru á heilsu-, umsorganar- og útbúgvingarøkinum. 

Og roknað verður við, at tey, sum arbeiða niðursetta tíð, varðveita sítt tímatal. 

Gjaldstovan hevur eisini yvirskipað mett, at verður arbeiðstíðin hjá fólki í vinnuni stytt tríggjar tímar, kostar tað vinnuni 500 mió. kr. í øktum lønar-, pensjóns- og arbeiðsmarknaðarútgjaldingum. 

Arbeiði - mynd: Vinnuhúsið

Verður arbeiðstíðin hjá fólki í vinnuni stytt tríggjar tímar, kostar tað vinnuni 500 mió. kr. í øktum lønar-, pensjóns- og arbeiðsmarknaðarútgjaldingum. 

Trípartasamráð

Ingilín D. Strøm, landsstýriskvinna, hevur svarað Beini Johannesen, løgtingsmanni, um fíggjarligar avleiðingar av styttari arbeiðsviku.

Tá arbeiðið við at stytta arbeiðsvikuna fór í gongd, var skipað eitt trípartasamráð, har partarnir á arbeiðsmarknaðinum eru við. 

Nakrar metingar eru um, hvussu nógv stytt arbeiðsvika fer at kosta.

Stór óvissa er tó í øllum metingunum.

Og partarnir í trípartasamráðnum eru ikki samdir um, hvussu útrokningarnar skulu gerast.

Sambært samgonguskjalinum skal arbeiðsvikan styttast so líðandi niður í 37 tímar.