Ingilín D. Strøm givið løgtingsmanni ófullfíggjað svar

Herfyri setti Beinir Johannesen, løgtingsmaður, Ingilín Didriksen Strøm, landsstýriskvinnu í arbeiðsmarknaðarmálum, ein grein 52a-spurning. 

Beinir Johannesen vildi hava at vita, hvørjar fíggjarligar avleiðingar fóru av vera av einari styttari arbeiðsviku. 

Í svarinum kemur fram, at verður arbeiðsvikan stytt við trimum tímum, so fer tað at kosta landi og kommunum 280 milliónir krónur, men av hesum fáa land og kommunur 100 milliónir krónur meira inn í skatti.

Fyri vinnuna fer tað at kosta hálva milliard krónur í øktum lønar-, pensjóns- og arbeiðsmarknaðarútgjaldingum, har Ingilín Didriksen Strøm sigur í svarinum, at Gjaldstovan hevur gjørt eina yvirskipaða meting um, hvussu nógv tað fer at kosta at stytta arbeiðsvikuna.

Varastjórin á Gjaldstovuni, Durita Tausen, kennir seg ikki aftur í grein 52a-svarinum hjá Ingilín Didriksen Strøm, landsstýriskvinnu í arbeiðsmarknaðarmálum, til Beinir Johannesen um fíggjarligu avleiðingar av styttri arbeiðsviku upp á 37 tímar.

Durita Tausen vísir á, at Gjaldstovan varð biðin um at gera eina útrokning til ein arbeiðsbólk, ið landsstýriskvinnan hevur sett til at arbeiða við evninum, og tí er hetta ikki ein greining til alment svar, ið landsstýriskvinnan hevur svarað í grein 52a-spurninginum.