Runavíkar kommuna tekur grundstykkir inn aftur

Tað gevur ikki meining hjá kommununi at gera nýggjar útstykkingar, samstundis sum fleiri grundstykki liggja, uttan at nakar er farin at byggja á tey, sigur borgarstjórin

Tað er stórur eftirspurningur eftir at seta búgv í Runavík. Nú verða grundstykki tikin inn aftur, har eingin bygging er farin í gongd eftir tveimum árum

Mynd: Savnsmynd

Emil Lisberg Jacobsen

28.09.2024 - 14:43

- Ein kommuna sum okkara kann ikki brúka eina rúgvu av peningi fyri at útstykkja, fyri at onkur liggur á stykkjunum uttan at byggja á teimum, tí so noyðist kommunan at útstykkja av nýggjum, hóast nógv grundstykkir liggja óbrúkt.

Tað sigur Tórbjørn Jacobsen, borgarstjóri í Runavíkar kommunu.

Kommunan fer nú í holt við at taka grundstykkir innaftur, har tvey ára freistin fyri at fara undir bygging er farin. Talan er um eini 30 grundstykki.

Stóra kommunukanningin hjá Kringvarpinum vísir, at bústaðarmøguleikarnir í Runavíkar kommunu kundu verið betri. Í kanningini siga 22% av teimum, sum hava svarað, seg vera illa nøgd við bústaðarmøguleikarnar. 15% siga seg vera væl nøgd við bústaðarmøguleikarnar í Runavíkar kommunu. Samanumtikið fær kommunan 47 stig av 100 í spurninginum um bústaðarmøguleikar. Miðal fyri landið er 44 stig.

Hoyrið samrøðu við Tórbjørn Jacobsen her:

Tobbi_grundstykkir_takast_inn