Favorittarnir vunnu í steypakappingini

VÍF, StÍF og KÍF livdu øll up til favorittheitið undan dystunum í 1. umfari í steypakappingin við monnum, sum vóru í dag.

Vestmenningar smurdu Neistan av á heimavølli. VÍF vann 35-25 eftir at hava verið á odda heili 21-9 í steðginum. Sjúrður Olsen (9) og fyrrverandi neistamaðurin, Dánjal Ragnarsson (8), skutu flest mál fyri heimaliðið, meðan Lýðar í Dímun (7) skoraðu mest fyri Neistan.

StÍF tók ímóti Team Klaksvík, og tað gekk javnt á í fyrra hálvleiki, sum endaði 12-10. Eftir steðgin fóru strandingar undan beinanvegin, og venjingarstøðan og breiddin komu til sjóndar. StÍF vann 31-21 við Trúgva Hávardsson (8) sum drúgvasta málskjútta. Nikolay Bliznov skeyt sjey mál fyri klaksvíkingar.

KÍF gjørdi eisini sína skyldu ímóti H71 II. Hans Eli Sigurbjørnsson skeyt níggju mál í dystinum, sum kollfirðingar vunnu 28-21. Esbern Patursson hjá H71 fekk reytt kort eftir steðgin, og tað gjørdi ikki uppgávuna hjá hoyvíkingum lættari.

Í gjár vann fyrsta lið hjá H71 27-22 á Kyndli í Hoyvíkshøllini. Dysturin var javnur, men síðsta korterið dróg heimaliðið frá. Rókur Ziskason (10) var toppskjútti hjá H71, og Brian Slyne skeyt sjey mál.