Kvinnur skulu ikki ræðast hormonspiral

Samanhangurin millum hormonspiral og bróstkrabba bleiv fyrr í mánaðinum almannkunngjørdur í stórari, danskari kanning. 

Tað er deildin fyri krabbameinsgransking hjá danska krabbameinsfelagnum, sum hevur gjørt kanningina. 

Niðurstøðan í kanningin sigur, at hvørja ferð 714 kvinnur í fimm ár hava brúkt hormonspiral, fær ein kvinna bróstkrabba orsakað av hormonspiralinum. Og vandin økist, jú eldri kvinnurnar eru, tá tær brúka spiralin. 

Í Føroyum verður hormonspiralur í stóran mun brúktur sum fyribyrging, og týpiskt er talan um vaksnar kvinnur, sum hava átt børn.

Diana Reynstind er serlækni í kvinnusjúkum. Sambært henni skulu tær flestu kvinnurnar, sum eru eldri enn 35 og brúka hormonspiral, ikki gevast at brúka hann, hóast nýggjasta kanningin vísir samanhangin millum hormonspiral og bróstkrabba.

- Tær kvinnurnar, sum vita, at tær eru í vandabólki, um mann hevur bróstkrabba í familjuni, mann vigar ov nógv, ikki venur regluliga, dámar væl at drekka vín og er yvir 35 ár, so møguliga mann kann umhugsa at brúka aðra fyribyrging. Men hjá teimum allar flestu kann hormonspiralurin vera sitandi, sigur Diana Reynstind.

Í morgunsendingini greiðir Diana Reynstind frá nýggju, donsku kanningini og samanhangin millum hormonspiral og bróstkrabba.