Bjarni Johansen og Tjóðveldi skipa samgongu í Vági

Levi Mørk verður kortini ikki nýggjur borgarstjóri í Vágs kommunu.

Tað ljóðaði annars, at endaliga semjuskjalið millum Javnaðarflokkin og Sambandsflokkin skuldi undirskrivast á fundi í kvøld, og hetta váttaði Levi Mørk sjálvur seinnapartin í dag, men á fundinum í kvøld boðaði Bjarni Johansen úr Javnaðarflokkinum frá, at hann ikki fór at skriva undir.

Og klokkan átta í kvøld kallaði Arni D. Brattaberg, fyrstvaldur hjá Tjóðveldi, sum bleiv størsti listi, nývalda býráðið inn til fund í morgin klokkan 10.00. Á skrá er skipan av Vágs býráð setuna 2025-2028.

Tað er ikki eydnast okkum at fáa nakra viðmerking í kvøld frá hvørki Bjarna Johansen ella Arna D. Brattaberg, men tað er sannlíkt, at Bjarni Johansen nú heldur fram sum borgarstjóri afturfyri at vera farin í valbólk við Lista E.

Levi Mørk, sum fyrr í dag segði við Kringvarpið, at tað var so gott sum klárt at undirskriva semjuskjalið millum Javnaðarflokkin og Sambandsflokkin við Levi Mørk sjálvum sum borgarstjóra, er ógvuliga vónsvikin av støðuni.

"Fyri trimum døgum síðan vóru vit samd um at skipa samgongu millum Javnaðarflokkin og Sambandsflokkin, men nú má eg bara ásanna, at tann semjan ikki helt. Eg havi alla tíðina havt fullan stuðul frá Sambandsflokkinum. Tað er í mínum egna flokki, at stuðulin hevur manglað," sigur Levi Mørk í stuttari viðmerking í kvøld.

Levi Mørk bleiv toppskorari á kommunuvalinum í Vági týsdagin við 131 persónligum atkvøðum. Bjarni Johansen var næstfremstur á Javnaðarlistanum við 108 persónligum atkvøðum.

Valið gav Tjóðveldi fýra býráðslimir, Javnaðarflokkinum tríggjar limir, og Sambandsflokkurin fekk tveir býráðslimir. Sostatt manglaði Tjóðveldi ein býráðslim fyri at fáa meiriluta. Hann hevur flokkurin nú fingið við Bjarna Johansen.